Meri jaan! Mere ishwar, Mere paramatma, Ek Khwab ki tarah se maine tumko jaana hai. Tumhara ehsaas mere bheetar saans leta hai. Mai tumhare dam se hi zinda hun. Mere bheetar tum bolte ho. Maine bahut ladaai ki hai khud se Parampita.
Meri jaan! Mere andar hi ek swaroop aisa hai, jisko pata hai tum nahi ho. Duniya kahti hai tum nahi ho. Wo jo ek bechaini hai, ki mai tarq se tumhein siddha nahi kar sakta, wo dukh deti hai. Mai haar jaata hun khud ke diye tarqon se. Phir mai rone lagta hun. Par meri gawaahi toh le li mere tarqon se. Par mere aanshuon ki gawaahi kaun lega?
Mere aanshu tumhare naam se nikalte hain Ram! Mere aanshu tumhare prem se nikalte hain. Inn par tumhara naam likha. Mai shayad wahi patthar rha hounga Treta yug ka, jis par tumhara naam likh ke taira diya gaya tha. Aaj bhi mujhe taira do parampita. Aaj bhi bhavsagar hai, tum ho, aur meri vivashta hai.
Mere ye aanshu dekhkar, Mere tarq hairaan ho jaate hain. Khud mai hairaan ho jaata hun. Ye kiske aanshu hain. Kiske liye. Aur itna zaruri mere liye tu kaise ho gaya mere ishwar. Teri ibadat mere liye itni zaruri kab hui?
"Jaane kiski aankhon se, Bahte hain aanshu mujhme!"
"mai toh ek Jahanuum hun, Kyun rehta hai tu mujhme?"
Na jaane ye kiske aanshu hain, na jaane tu kaun hai kya hai. Mai ro rha hun hun parampita. Tumhari yaad mein ro rha hun. Tumhein yaad karke ro rha hun. Mujhe maaloom hai, ki shayad tumko mai hasta hua hi pasand hun. Zindagi ke baaqi sab palon mein toh hasta hi hun. Abhi toh ro lene do. Mera aur kaun hai paramatma tere siwa. Meri hasti ki pahchaan tujhse nahi toh aur kya hai.
Mujhe pata hai teri bhakti, tera prem ek din mujhe pagal kar dega. Mera naam mujhse chheen lega aur mujhe tera sanyaasi kar dega. Mai gumnaam hona chahta hun. Mai tere naam ki gumnaami mein khona chahta hun. Mere bheetar ki saari icchaayein, teri icchayein hain. Mere andar ki saari kunthayein, tujhe paane ki kunthaayein hain.
Prabhu! Sach mein, mera hona, mere liye ek jahanuum hai! Siwa dukh, Siwa kasht, Siwa kuntha maine kab kya paaya. Har daud mein gira aur agar jeeta bhi toh haarne ke liye. Mujhe tere darwaaze ki chaukat pe hi so jaana hai meri jaan!
Mere andar ka naastik hairaan ho jaata hai. Itna prem? Itna gahra prem. Uske liye jisko dekha bhi nahi kabhi. Puchta bhi hai, Kiske liye rote ho? Kon ishwar? Khud ko dukh mat do!
ye dukh toh nahi hai meri jaan! Ye toh sukh hai! Paramsukh! Chetna ka sukh! Hosh ka sukh! uski yaad mere bheetar mere hone ko aur jagaati hai! uski yaad mein rona bhi sukh! Duniya mein khush hona bhi dukh.
Mere iss niyam se rone ko mera dhong na kehna meri jaan!
"Jo tumein dekhta hun, wahi khud mein dekhta hun!
Mai namaazi hun tere sapne har jumme dekhta hun!"
Jaise Koi musalmaan, 5 waqt namaaz ada kare! Mai bhi toh musalmaan hun! Tu mera bhi toh nabi hai! Tere liye mai 5 baar namaaz na padh sakun, lekin 1 baar toh padh lun. Ye mere aanshu se wazu karlein. Yahi aashu mera deen, mera imaan mere maula!
Yaqeenan mera koi dharm nahi hai! Tu mera dharm hai. Maine duniya khokar tujhe paaya hai!
Tu meri chetna ki aawaaz bankar bolta hai. Wo chetna jo ab vayask hona chahti hai. Mukti chahti hai!
isliye toh rota hun!
Jaise ek aurat ko garb ka prasav hota hai aur wo roti hai, ek aanshu ka qatra uski gaalon pe ludakta hai, aur jab wo pahli baar apne bacche ko dekhti hai! uss ek pal mein, Jo ishwar usey dikhta hai, Ye naya baccha, Ye nayi se nanhi si jaan! Mere ishwar, Mere aanshu tere aane ki ghosna hi toh hain.
Tu mujhme se hi aayega! Duniya ko janm tune diya lekin tujhe janm mai dunga. Mera prasav pura hua meri jaan! Mere bacche! mai na jaane kitne janmon se haarta chala aata hun. Mai jo har janm mein tujhe paane se reh jaata hun. Iss baar! ab mujhko bhi ho deedaar tera.
Kya khoon rab ne kiya, Bin maange hi itna diya,
Warna hai milta kahan? Hum Qaafiron ko Khuda.
Tera ye Qaafir, Tera murid ho gaya. Tera namaazi ho gaya. Isme aascharya kya? Tu hai hi aisa! Tu meri auqaat se zyada ki kamaai hai! Mai gunga hun aur mujhe gud khila diya gaya hai! ab mai kaise apni khushi zaahir karun!
Mai tera sannyaasi thehra, Mai jo kal kuch bhi nahi tha!
Meri saari ghazalon pe tera naam likha hai,
"tann mann radha ka ho jaaye, aur achanak raas ghate,
Jeeta Sikandar haar qubooley, tab jaakar sannyaas ghate!"
Mere saath yahi toh hota hai! Tere dhyan mein mai teri radha ho jaata hun! Phir tu aata hai, Mujhe chookar chala jaata hai, Mere shareer mein aag lag jaati hai. Tera sparsh mujhe zinda kar deta hai, Teri aahat mujhe aawaaz deti hai, Mere shareer ki dil ki dhadkan, teri aahat pe machalti hai.
Mai koi sikandar toh hun nahi, par maine kitni baar haar qubooli hai. Ab sannyaas ghat jaaye! Mai pratiksha karunga mere bhagwaan! Mai pratiksha karunga! Zindagi ke ant tak, agle janmon tak! Mai pratiksha karunga!
Mere aanshu samaapt ho gaye! teri ibadat puri hui! Jalaabhishek swikaar karo! ye saare aanshu se tumhara jalabhishek karta hun!
Ye Swaantah Sukhaay hai!
No comments:
Post a Comment