Ek gaanv tha. Gaanv ka naam tha, "Suno". Suno gaanv mein saare log Bahre the. Ek ek aadmi, ek ek aurat. Din bhar uss Gaanv se chilaane, rone, peetne ki aawaazein aati rehti thi. Har koi apni baat kehna chahta tha. Par kaun sune? Suno Gaanv mein koi sunne wala nahi baccha tha. Suno gaanv ki badnaami har aas pass ke gaanv mein faylne lagi thi.
Mard apni auraton ko maarte the, sochte the ki Unki patni unki baat nahi sunti, zarur kisi aur ki sunti hogi. Yaani randi hogi. Auratein maar khati thi lekin Wo bhi apni baat kisi ko sunana chahti thi, par unko lagta tha ki unke pati kisi aur aurat ki baatein sunte hain.
Koi Suno gaanv mein aana nahi chahta tha. Lekin Phir jo uss gaanv mein hua, Meri Kahani uss Ghatna ki hai.
Uss Gaanv mein Boli naam ki aurat ne ek din apne pati Bola se kaha, "Sunte ho! Mera baccha hone wala hai, Kisi aurat ko bula do!". Bola behra tha kaise sunta. Bola apna kaam karta raha.
Boli dard mein karaah rhi thi. Aur phir Usne ek bacche ko janm diya.
Bacche ko haath mein lekar Bola bola, "Kyu ri Boli? Kiska baccha hai ye?"
Boli ko sunai nhi diya. Boli bacche ko dekh kar muskura rhi thi.
Bola samajh gaya ki Ye kisi aur ka baccha hai. Wo uss bacche ko Fekne chala gaya. Boli dard ke kaaran uth nahi paayi, lekin Bola ko uska baccha le jaate dekh roti rahi.
Fekne waali jagah thi ek, Jahan saare pati apni patniyon ka baccha fekte the. Jagah ka naam tha, "Ye Kiska baccha hai?"
Wahan ek Kua tha. Neeche jhaankne par dikhta tha ki hazaaron bacche, wahan Feke hue, mare hue the. Sadne ki badboo aa rhi thi.
Bola bacche ko Fekta isse pahle hi usne gusse mei bacche ki ore dekh ke bola, "Saale! Kiska paap hai tu?", "Ye sunte hi 1 din ka baccha, ungli utha kar ishara karta, yun ki keh raha ho, aapka baccha hun.
Bola ko samajh hi nahi aaya kya hua. Zindagi mein kabhi bhi kisi ne uski baat ka jawaab nahi diya tha. Na ishare se, Na chehre se. Aawaaz toh usey sunaai hi nahi deti thi.
Uske dil mein ek ajeeb sa pyar paida ho gaya uss bacche ke liye. Usne phir pucha, "Tu mera baccha hai?"
Bacche ne sar hila diya. Mujhse ye mat puchna ki 1 din ka baccha sar kaise hila sakta hai. Agar Suno gaanv mein sab behre ho sakte hain, toh ye bhi ho sakta hai.
Bola, uss bacche ko wapas ghar le aaya. Usne uss bacche ka naam rakha, "Ishara!"
Ishara apni maa boli ka dulara tha. Uski maa usko god mein leke din bhar usse baatein karti. Zindagi bhar ki uski tanhai, Ishare se baat karke puri hoti. Ishara hasta. Ishara validation mein sar hilata.
Ishara wo sab karta jo Boli ko chahiye tha. Ishara sunn sakta tha. Suno gaanv mein pahla sunne wala paida ho gaya tha.
Bade hokar Ishara ek bada sant bana. Aur apna naam rakha usne, "Shrawan Kumar".
Shrawan kumar ke pass purey ganv ke log baat karne aate the. Shrawan kumar unki baatein sunta. Kuch nahi kehta. Bas wahi ishara. Aur logon ne dil hara. Log uske ek ishaare pe, dil haar baithte. Ishara urf Sharavan kumar ki Khyati failne lagi.
Dur dur se alag alag gaanv se, log sirf usko sunne aate. Ishara sabki baatein sunta. Ek ajeeb satsang hota tha Ishare ka. jahan sirf log bolte the, Ishara sunta tha. Kisi ne aaj tak Ishare ko Isharon ke alawa baat karte nahi suna tha.
Mano ki wo bachpan se bola hi nahi tha. Uski maa boli kehti, Beta kuch bol! Kuch toh bol. Ishara na mein sar hila deta. Ishara iss janm mein bas sunne ke liye paida hua tha shayad.
Phir dheere dheere jalne waale paida ho gaye. Ishare ne bahut se gorakh dhande band karwa diye. Bacchon ko fekna band karwa diya. Uss gaanv ki puri economy, puri polity, pura administration, Ishaare ke Isharon mein naachta tha. Swabhavik hai, ki Kuch log jalne lagey.
Unhone afwaah uda di ki Ishara toh Gunga hai. Uske pass wo ek skill hi nahi hai, Jo suno gaanv mein rehne waale har aadmi ke pass honi chahiye. Wo usse anti-national ya anti-gaanv ghosit karna chahte the. Ab afwaah logon ne suni kaise hogi, ye mat pucho. Usne parche chhaape the. Logic mat lagaao. Dil se suno. aur Meta-logic lagaao lagana hai toh.
Jalne waalon mein sabse bada tha, "Badbola singh".
Badbole ne pura dimaag laga diya.
Ishara dheere dheere sabko khatakne laga. Sabko lagne laga Ishara dhongi, anti-national hai. Sab ne Ishare se request ki, ki wo bhi kuch bole.
Ishare ne haan mein sar hilaya. Lekin ek bade se blackboard pe likh diya jab pura gaanv chup ho jayega tab mai bolunga.
Purey gaanv mein baat fail gayi. Badbola singh ki gaand fatt gayi. Agar Ishara bolne laga, toh Badbole ke Muh par kutta bhi nahi mutega.
Badbola singh ne socha, sala mai chhup hi nahi hounga. Bolne nahi dunga usko.
Exam ka din aaya. Sab jama hue. Ishara bolne hi wala tha ki Badbola chilaane laga. Logon ko sunai nahi diya, lekin Ishara toh sunn sakta tha. Ishara chup ho gaya. Badbola chup hi nahi hota tha. Logon ko lagne laga ki ishara bol hi nahi paa raha.
Log udaas hone lagey. Badbola jeet gaya. Ishara ki haar hui. Ab Ishare ko gaanv chorrna pada.
Jaate jaate ishare ne Gaanv ke blackboard pe likh diya, "Tum sab behre nahi ho! Kam bologe toh sunn paaoge! agar bahut dil se kabhi mujhse baat karne ka dil kare toh yaad karna, Mai tumhare padosi mein hun, mai tum mein bhi hun, mai har jagah hun. Usse apni baat kahna. Lekin uski bhi baat sunna. Jab tumhara padosi bolta hai, toh mai bolta hun!"
Logon ko baat samajh aayi. Log ek dusre ki baat sunne lagey. badbola singh ko logon ne jaan se maar diya. Badbole log jo sunna nahi chahte wo mar hi jaayein toh acha.
Ishara chala gaya. Lekin kaam kar gaya.
Aaj bhi kuch sawaal har Suno gaanv ke rehne walon ko satata hai.
1. Ishara paida kaise hua, jab Bola boli dono behre the? Ishara kaise sunn sakta tha?
2. Ishare ne kabhi kuch kyun nahi bola?
3. Gaanv mein logon mein se kisi ko ye khayal kyun nahi aaya ki wo log behre nahi hain, bas bolte chale jaa rahe hain isliye, kisi ko kuch sunai nahi de raha?
4. Kya har baar koi Ishara jaise avataar ka intezaar karna padega, Suno jaise har gaanv ko?
5. Kya har ishara ko anti-national, Gaanv drohi kehkar nikaal diya jayega?
6. Iss kahani ka kya point tha aur story writer ne humlogon ko shuru mein behra kyun banaya?
7. Iss kahani mein Kuch Horror kyun nahi tha? Chutiya kyun banaya humko?
ye kuch sawaal hain, Jo sirf aur sirf story writer ko pata hain, Aur har Suno gaanv ka rehne wala, inn sawaalon pe sochta rehta hai. Kuch Philosophers bhi ho gaye hain. Jinke apne apne vichar hain inn sawaalon par.
Par asli jawaab koi nahi jaanta Suno gaanv mein. Haan ek aur change aaya hai, Ab Suno gaanv ka naam ho gaya hai, "Sunao" Gaanv.
No comments:
Post a Comment